មេអំបៅគឺអូន

និពន្ធនៅខែ តុលា ២០០៨
ដោយទី ធាវី​ សមាជិកអ្នកនិពន្ធខ្មែរ
 Tel: (855) 89 21 49 11
 

១. ផ្កាថ្កុលមួយទង....រសរងគួរអោយអាណិត          

លំអងរុះរោយក្រៀមស្វិត.....ដាច់ចិត្តរើសមកថ្នមថែរ

លះបង់គ្រប់យ៉ាង....គិតស្មានថាចិត្តនាងប្រែ           

នេះឬជាកម្មបុព្វេ....អូនប្រួលប្រែភ្លេចស្នេហ៍ថែរស្រី។

២. នេះឬចិត្តក្បត់....សម្បថអូនជាឆាកល្ខោន           

ចិត្តស្រីមាយារាប់ពាន់... បំភាន់ស្នេហ៍ស្មោះភក្តី

តើប៉ុន្មានទៀត .....ទើបល្មមសមនឹងចិត្តស្រី              

ឬអូនតាំងខ្លួនរាជសី.... មានតែថ្ងៃស្រស់ស្អាតរហូត។

R. អូនក្លាយជាហង្ស...មាយាទឆោតល្ងង់លុងប្រាក់ដូល្លា       

ភ្លើតភ្លើនឃើញផ្ទះវិឡា ..លុងហ៊ឺហារឡានថ្មីប្តូរម៉ូដ

អូនគង់ដឹងខ្លួន...ពេលស្ងួនអស់លក្ខធ្លាក់កូដ           

ញាតិមិត្តគេមិនរាប់រក... ដូចពពករសាត់តាមខ្យល់។

៣. ហង្សអើយអើយហង្ស.....បេះដូងជាមេអំបៅ               

ទៅចុះបើអូនមានផ្លូវ... មិនខ្លៅខ្លោចចិត្តមិនខ្វល់

ជួនពរម្ចាស់ហង្ស... សង្ឈឹមគ្រងហង្សបានដល់        

បងសូមអង្វរនិមល... ឈប់វិលវល់ក្នុងភពកាមគុណ។