‘យប់មិនព្រាត់ថ្ងៃ’ ស្នាដៃអត្ថបទចំរៀងលោកទី ធាវី បានជាប់ចំណាត់ថ្នាក់

ភ្នំពេញៈ យប់មិនព្រាត់ថ្ងៃ គឺជាចំណងជើងអត្ថបទចម្រៀងមួយក្នុងចំណោមអត្តបទប្រ​លង​ជ្រើសរើស​ចម្រៀង​១៦១២ ស្នាដៃដែលបានដាក់ប្រកួតនៅស្ថានីយ៍ទូរទស្សន៍អាស៊ីអាគ្នេយ៍។

លោកទី ធាវី ជាបេក្ខជនជាប់ចំណាត់ថ្នាក់ស្នាដៃ​ដែលត្រូវបានស្ថានីយ៍ទូរទស្សន៍​អាស៊ី​អាគ្នេយ៍​បាន​​អញ្ជើញចូលរួមទទួលប្រាក់រង្វាន់ជ័យលាភី នៅស្ថានីយ៍​ផ្ទាល់កាល​ពីថ្ងៃ​សៅរ៍ទី​១៤​​ខែកញ្ញា ឆ្នាំ២០១២ កន្លងទៅនេះ បានមានប្រសាសន៍ថា ‘ខ្ញុំមិននឹកស្មានថា ស្នាដៃរបស់​ខ្ញុំ បាន​​ត្រូវ​គេជ្រើសរើស​ឡើយ។ ខ្ញុំរំភើបមែនទែនពេលដែលអ្នកនិយាយទូរស័ព្ទបានប្រាប់ថា ស្នាដៃប្រលងរបស់ខ្ញុំជាប់ចំណាត់ថ្នាក់។​’

លោក ទី ធាវី ជាអ្នកសរសេរប្រវត្តិសាស្ត្រតំបន់ភ្នំក្រវាញ សម្រាប់គម្រោង អេកូទេសចរណ៍ជី ផាត និងត្រពាំងរូង នៃអង្គការអភិរក្សសត្វព្រៃ និងព្រៃអន្តរជាតិ​​មួយ​ឈ្មោះ​អង្គការ​សម្ពន្ធមិត្ត​សត្វព្រៃ គឺជាសមាជិកម្នាក់របស់សមាគមអ្នកនិពន្ធខ្មែរ។ លោក ធ្លាប់បានសរសេរ អត្តបទរឿង ប្រវត្តិនៅតំបន់ភ្នំក្រវាញ និងរឿងប្រលោមលោកផ្សេងទៀត។ ថ្មីៗនេះ ស្នាដៃប្រវត្តិសាស្ត្រតំបន់ភ្នំក្រវាញរបស់លោកក្រៅពីប្រើប្រាស់ក្នុងការបណ្តុះបណ្តាលមគ្គុទេសក៍ដោយខ្លួនលោកផ្ទាល់ គេក៏ឃើញមានចុះក្នុងប្លក់ និងវេបសាយ http://kerdomnel-khmer.org/?s=ty+theavyនោះផងដែរ។

លោក ហ៊ន សុភក្ត្រ នាយករងទូរទស្សន៍អាស៊ីអាគ្នេយ៍​បានមានប្រសាសន៍​ក្នុងពិធី​ប្រកាស​ជ័យ​លាភីថា មាន២៨ស្នាដៃដែលបានជាប់ជាចំណាត់ថ្នាក់។ ជ័យលាភីនេះ បានឆ្លង​​​កាត់​គណៈ​កម្មាធិការកំណែរកែយ៉ាងយកចិត្តទុកដាក់ ទាំងអត្ថន័យ អត្ថរស់ និងសោភ័នរបស់វា។

ឯកឧត្តម គឹម សាន បានមានប្រសាសន៍ថា ស្នាដៃជ័យ​លាភីនេះ​គឺជារស​ពិសេស​ដែល​បម្រើផល​ប្រយោជន៍សង្គម​ខ្មែរទាំងមួលហើយមានលក្ខណៈខុសពីចម្រៀងស្នេហាធម្មតា។