ជូនពរអោយអូនជួបប្រុសម្នាក់នោះស្មោះដូចបង

គ្រប់យ៉ាងបានធ្វើកន្លងមកវាពិបាកនឹងបកស្រាយណាស់។ ចំពោះបង បងតែង​បានប្រាប់​អូន​ថា បង​ស្រលាញ់​អូន​ដោយសារតែការអាណិតតែម្យ៉ាងគត់​។​ក្តីអាណិតនេះ​បានឈានដល់​ស្នេហា​កំពូល​មួយ។​ទាំងអូនទាំងបង​តែងតែឆ្ងល់និងមិនដឹងថាតើវាមកពីមូលហេតុអ្វីឡើយ។ គ្រាមុននេះ អូនស្អប់បងណាស់ ព្រោះបងគឺជាមនុស្សស្រីច្រើន។ ប៉ុន្តែមិនដឹងយ៉ាង​ម៉េចទើប​អូន​ស្រលាញ់បង។ នេះបើតាមអូនប្រាប់បង។ មែន! បងក៏ព្យាយាមយក​ឈ្នះចិត្តអូន​អោយ​ខាន​តែ​បាន​ផងដែរ។  ក្រោយ​ពីយើងស្រលាញ់គ្នាមក  បងបានកំណត់​ចិត្តខ្លួន​ឯង​ច្បាស់​​ណាស់ ថា​នឹង​​រក្សាសន្យា​ចិត្តស្មោះ​ចំពោះអូន។ ផ្ទុយទៅវិញ អូនវិញទេ​ដែលតែងតែ​មិនជឿលើបង។ បង​មិន​ដែលប្រកាន់នឹងអូនទេ។ អូនចូលចិត្តចំណាយពេលនិយាយទូរស័ព្ទ និងរករឿង​ឈ្លោះ​មិន​ចេះ​ចប់។ ដោយក្តីស្រលាញ់ និងអាណិត បងនៅ​តែស៊ូទទួល​យកទាំងលំបាក។​ អូនគិត​ទៅ​មើល! អូនថា​ប្រច័នបង តែអូនវិញ បែរជានិយាយ​ទូរស័ព្ទជាមួយ​ប្រុសនៅ​ហ្នឹងនៅ​មុខបង​ជារៀង​រាល់ថ្ងៃ។ បងពិតជា​មិនយល់ទេ។  រាល់ខែបង​ត្រដរស់​ព្រោះ​តែអូន។  បងបាន​រំលែក​ប្រាក់​ដែលបងមាន​ទៅអោយ​អូនទុក​ចាយ​វាយជារៀងរហូត។ ​ បង​តែងតែគិតថា បងសម​នឹង​ទទួលយកអូនព្រោះជាព្រហ្មលិខិត​ ហើយសូម​តែម្យ៉ាង​គត់គឺ​អោយ​អូនមាន​ចិត្តស្មោះចំពោះ​បង។​ ត្រូវទេ! អូនប្រាប់បងថា អូននេះស្មោះនឹងបង​ហើយ​អូន​ទូរ​ស័ព្ទ​ទៅគេ គឺគ្រាន់តែ​និយាយ​លេង ប៉ុណ្ណោះ។ គ្រប់យ៉ាង​បងខំរស់​ទាំងញញឹម​ព្រោះមិន​ចង់​អោយ​គេដឹងរឿង​យើងពិត។ អូនតែង​តែចោទបងថា​បងនេះជាបុរស​ពាក់ស្រោម​មុខ ព្រោះអូនគិតថា​បងស្រលាញ់នារី​ផ្សេង​ដែល​អូនស្អប់បំផុត។ អូនថាអូន​ស្រលាញ់​បង​ណាស់។ អូនយំរាល់ថ្ងៃ​ព្រោះអូន​ស្រលាញ់​បង​ពេក។ បងក៏​អាណិតអូនណាស់ដែរ។ ប៉ុន្តែ​គ្រានេះ អ្វីៗ​បានស​អោយបង​ឃើញ​ច្បាស់​ដោយ​ហារ​លែងចេញ។ តាមពិត​អូនវិញ​ទេដែល​ពាក់ស្រោមមុខ។ ពេលបងឈឺសូម​អោយ​តែអូន​កោស​ខ្យល់អោយបង តែអូនខ្លាច​អ្នកដទៃគេ​ដឹងថា​អូននឹងបងមានទំនាក់ទំនងជាមួយគ្នា។​ អូនមិនដែល​ខ្វល់ចំពោះបងសូម្បីតែបន្តិច។ បងយល់ថា​រឿង​យើងពេលនេះគួរតែចប់ហើយ​គឺ ចប់​​​​ហើយ​​​​រឿងយើង។​ សូមជូនពរ​អោយអូន​បានជួបប្រុសម្នាក់​ដែលអូន​តែងតែទូរស័ព្ទ​នោះ​មាន​​ចិត្តស្មោះទៅចុះ។ ធ្វើម្តេចបង​គឺជាមនុស្ស​ដែលគ្មានតម្លៃចំពោះអូន ។ កន្លងមកគឺ​មានប្រាក់ដែល​យកពីបងទេ​ដែលមានតម្លៃ​សម្រាប់​អូន។​ បងពិតជាខកបំណង​យ៉ាងខ្លាំង​ជាទី​បំផុត។

ត្រពាំងរូង ថ្ងៃ១១ ខែតុលា ឆ្នាំ២០១២

ពីបងបុរសឈឺគ្មានអ្នកមើលថែ


ដោយ ទី ធាវី
Email: tytheavy@gmail.com
Tel: (855) 89 21 49 11